Vieiros

O informe, titulado "A muller e a infancia: o duplo dividendo da igualdade de xénero", presentouse este mediodía simultaneamente en todo o mundo. No caso de Galiza, a presentación fíxose no Club Internacional de Prensa, en Compostela. O traballo fai unha análise da situación de discriminación que viven as mulleres ao longo da súa vida e achega solucións para eliminar a desigualdade e impulsar a autonomía das mulleres e das nenas. No documento faise unha análise da situación da muller no mundo e de como a igualdade de xénero pode contribuír a acadar os Obxectivos de Desenvolvemento do Milenio. A Unicef chega á conclusión de que investir nos dereitos da muller terá beneficios tanto no avance dos dereitos das mulleres coma dos nenos e nenas.

Sesenta anos despois da creación da Unicef, aínda morren cada ano dez millóns de cativos, xeralmente por doenzas que se poderían evitar mediante remedios tan sinxelos como a vacinación. A taxa máis elevada de mortalidade infantil dáse na África subsahariana, onde se rexistran 162 mortes por cada mil nados.