Vieiros

Segundo a lexislación estatal, polo Real Decreto 801/2005 do 1 de xullo, esta cesión só pode efectuarse en tres supostos: subasta e adxudicación da vivenda por execución xudicial do préstamo, cambio de localidade do residente, ou casos como familias numerosas que precisan maior espazo polo incremento do número de membros ou por incapacidade sobrevida, persoas maiores de 65 anos, vítimas da violencia de xénero ou do terrorismo que desexen cambiar de aloxamento, ou persoas que precisen trasladarse a vivendas de dimensións máis pequenas. En calquera caso, requírese a previa cancelación do préstamo. Debe ser presentada unha solicitude perante o delegado provincial da Consellería de Vivenda e Solo, e demostrar que o próximo adxudicatario reúne as cualidades para optar a unha vivenda de protección pública ou autonómica. E o rexime legal das vivendas durará e calquera caso trinta anos.

Noutras comunidades
Non obstante, son moitas as comunidades que ampliaron este prazo ou endureceron as medidas de control sobre estas vivendas: A Rioxa estendeuno de dez a trinta anos. O Instituto Rioxano de Vivenda ten dereito de tanteo e retracto en calquera transacción, e unha vez que volvan á Administración, os pisos volverán a ser sorteados entre os demandantes rexistrados. Algo semellante aconteceu en Andalucía, que, con todo, acaba de reducir estas restricións: a reforma afectaba a todos os pisos construídos antes de 1978, e agora xa está no 92. E os prezos máximos que pagará a Junta son do 200% sobre o prezo inicial.

O goberno navarro foi o primeiro en sacar unha normativa autonómica, no 2004: faculta tanto ao goberno autonómico como aos concellos para o tanteo e retracto, e exténdeo a todas as compravendas que teñan lugar até trinta anos despois da primeira adxudicación. O goberno vasco, pola súa parte, lanzou unha investigación sobre titulares de vivendas protexidas.

A Generalitat aumentou de vinte a noventa anos a catalogación como vivenda protexida. E o goberno madrileño implantou para si o dereito preferente na adquisición de VPO á venda, e, malia non ampliar o prazo de catalogación, obriga aos notarios a notificar as compravendas.