Vieiros

Para Romeu, o conflito toponímico que se viviu na Coruña nos últimos anos e que acabou nos tribunais é "artificial". Para sorpresa de moitos, o conselleiro propuxo onte un "consenso" de todos os partidos para buscar fórmulas que non "molesten" a ninguén. Aínda que non o dixo explicitamente, o conselleiro coruñés considera que sería posible empregar de maneira oficial o nome da cidade en galego e castelán. Cando se refire a outras zonas do Estado, Méndez Romeu olla para o que acontece en Euscadi: Vitoria/Gasteiz, San Sebastián/Donosti, etc. Incluso hai xente do PSOE coruñés que defende, como solución drástica, a eliminación do artigo en todos os casos.

Dende A Mesa pola Normalización Lingüística foron moi claros: A Coruña é o único topónimo oficial da cidade. Calquera outra fórmula busca facerlle cambadelas á legalidade. Recordan que tanto a Lei de Normalización Lingüística (1983) como Plan Xeral de Normalización da Lingua Galega (2004) foron aprobados por unanimidade no Parlamento de Galiza. Por se isto fora pouco, os tribunais están fartos de darlle a razón aos defensores da forma galega. A Mesa considera "esperpéntico" que Política Lingüística dependa organicamente de Romeu, a quen acusan de terlle fobia o noso idioma.

Cómpre lembrar que Méndez Romeu foi durante 18 anos un dos concelleiros máis influentes nos gobernos municipais de Francisco Vázquez. Este profesor de Lingua Española foi un dos que abandeirou, canda o alcalde, a loita contra o topónimo galego. Cando en 2005 foi nomeado conselleiro de Presidencia, moitos viron a longa man de Paco Vázquez na decisión de Touriño. O rexedor que máis ten polemizado co nacionalismo colocaba a un dos seus homes no goberno de coalición, nun departamento que, por riba, tiña certa ascendencia sobre a Secretaría de Política Lingüística.

A preguntas de Vieiros, Marisol López sinalaba por medio do seu gabinete de prensa que a Secretaría Xeral de Política Lingüística defende o topónimo galego como o único válido. Recoñecía que a lei hai que respetala e cumprila. Aínda así, López prefire non entrar a valorar punto por punto as palabras do conselleiro e limítase a dicir que o seu departamento traballa para facer cumprir a lei. Todo apunta a que hai unha importante división de criterios dentro dos socialistas.

Dende Política Lingüística tamén quixeron precisar que dependen funcionalmente da propia presidencia, que é quen ditaría en última instancia as directrices políticas e non o departamento de Romeu.