Edición xeral
O BNG di que Orozco facilita "unha administración paralela" a través da empresa municipal de solo
"Orozco quere converter Evislusa nunha ETT, un chiringuito de contratación con vistas nas próximas eleccións municipais", queixouse este martes o voceiro do BNG, Xosé Anxo Lage. Os nacionalistas consideran que a contratación de operarios para tarefas ordinarias de mantemento urbano non se axusta aos estatutos de Evislusa, creada para a xestión de solo municipal. Sen tregua durante as festas do San Froilán, os partidos políticos lugueses soben o ton dos discursos, e logo da visita de Rajoy para lanzar oficialmente ao candidato do PP para o Concello de Lugo, Xaquín García Díez, o alcalde, Xosé Clemente López Orozco, asegura que unha sondaxe do PSOE lle dá ao seu grupo 14 representantes no Concello, un máis sobre a maioría absoluta da que xa goza.
"Pretende usar Evislusa como unha Empresa de Traballo Temporal ao seu servizo a través da que vender favores e traficar con postos de traballo de cara ás eleccións, escapando ao control sindical e ás premisas e garantías que rexen as contratacións na Administración pública", afirmaba este martes Xosé Anxo Lage. O BNG considera que as contratacións, que saíron adiante cos votos de PSOE e tamén de PP, "son fraudulentas", e pediu informe xurídico ao respecto que aclare o que cualifican de "burla aos sistemas selectivos".
Por outro lado, o candidato do PPdeG á alcaldía de Lugo, Xaquín García Díez, pedíalle ao rexedor que adicase esforzos a "solucionar os problemas de Lugo" no canto de promover enquisas electorais. Díez opina que Orozco non lle está facendo fronte aos compromisos adquiridos cos cidadáns e quere "despistar aos votantes". O candidato popular respondía así ao anuncio dos socialistas lugueses de que unha sondaxe encargada polo partido lle daba 14 concelleiros ao PsdeG, por 8 para o PPdeG e 3 para o BNG.
Máis Alá, Fwwwrando, Galego.org, GZ-Deportiva, Canal Verde, Lusofonía, Irimia, Cartafol, Murguía
RSS
| Que é Vieiros?
| Que é o RSS?
| Creative Commons
| Publicidade
| Director
| O equipo
| Contacto