Vieiros

"Este é un triunfo para a política europea de Montenegro", afirmou este domingo o primeiro ministro de Montenegro, Milo Xukánovich, ao coñecérense os resultados provisionais que lle daban a vitoria ao DPS, a coalición tripartita de centroesquerda que liderou cara ás eleccións celebradas esta fin de semana. "Os comicios demostraron que Montenegro é un país estábel e que está de xeito firme no camiño de Europa", declarou Xukánovich, que tanto como presidente como no cargo de primeiro ministro, estivo desde comezos dos anos 90 no primeiro plano da política de Montenegro. O reconto provisional dálle entre 39 e 41 escanos sobre un total de 81 asentos, e aínda no caso de non chegar á maioría absoluta, os pactos poselectorais faríanlle doado ao DPS esa maioría parlamentaria. Atrás desta formación aparece a Lista Serbia, co aval do trinta por cento de poboación de orixe serbia que hai no país recén independizado.

• Anterior: Montenegro proclama a súa independencia