Vieiros

"A sociedade galega non pode ficar indiferente.

Quen queira que pense en poder utilizar estes modos do terrorismo incendiario para atentar, de novo, contra os recursos naturais e a dignidade de Galiza ou para descrédito das capacidades do país non pode deixar de saber da repulsa unánime e contundente de todo o país.

A Plataforma Nunca Máis, ante a situación de emerxencia que, provocada polo lume, hoxe vivimos en Galiza e dende a sensibilidade que nos ten unido na defensa dos nosos recursos naturais, fai un chamamento urxente á sociedade para lograr unha contundente mobilización de toda a cidadanía de Galiza en defensa da riqueza e do patrimonio natural dos nosos montes.

Hoxe, igual que na maré negra do Prestige, todos e todas, da cidade ou do rural, do interior ou do mar, estamos sendo afectados e agredidos por esta vaga de lumes; todos e todas estamos a sufrir os impactos dun lume incontrolado que está a destruír a riqueza e potencialidades do noso monte e que ameaza con converterse nun desastre ambiental para o monte, en primeiro lugar, pero tamén para os ríos e as rías de Galiza.

Nunca Máis entende que neste momento non pode haber máis prioridade que a da loita contra o lume mais tamén se fai imprescindíbel por parte da Xunta de Galiza outra política de ordenación do territorio e un cambio de rumbo nas políticas para o noso monte desenvolvida nas últimas décadas.

Este cambio de rumbo, consensuado cos diferentes sectores implicados, deberá ter como obxectivo a preservación e valorización dos nosos montes, como única garantía de afrontar desde un punto de vista estrutural o compromiso dos poderes públicos coa nosa riqueza forestal e o noso medio natural. Xuntamente con isto, igualmente se van ter que desenvolver novas políticas orientadas ao medio rural, co fin de frear o seu despoboamento, co que iso implica tamén para os nosos montes".