Vieiros

A chamada Rede Natura non incluíra na súa lista de zonas protexidas o lugar de Corrubedo onde Stolt Sea Farm proxectaba construír unha pranta acuícola multifunción. Malia iso, o goberno galego amosárase disposto a responder ás demandas veciñais, que subliñaban o alto valor paisaxístico da zona, e comprometérase xa a incluíla na rede de espazos protexidos. Por ese motivo, a Xunta propúxolle á empresa unha ubicación alternativa en Porto do Son, iniciativa que logo duns días de negociación o xerente de Stolt Sea Farm comunicou que é aceptada.

"Trátase de harmonizar e compatibilizar o desenvolvemento da actividade acuícola coa conservación e a protección da natureza", afirman desde o executivo, ao tempo que lembran que se está revisando o Plan de Parques de Tecnoloxía Alimentaria na costa galega, aprobado polo goberno de Manuel Fraga, e que na opinión de socialistas e nacionalistas non atendeu á necesidade de combinar os espazos adicados á acuicultura, sector de crecente importancia económica, co respecto ao medio ambiente. Por ese motivo, vaise analizar polo miúdo cada un dos proxectos promovidos ao abeiro dese plan, que revisan a fondo as consellarías de Pesca, Política Territorial e Medio Ambiente.

Stolt Sea Farm tamén ten en proxecto outra instalación de acuicultura en Arou (Camariñas) e a ampliación da que xa dispón en Quilmes (Carnota). A empresa pretende duplicar capacidade produtiva en Galiza cara a 2010. Na actualidade, a súa delegación con sede en Carnota amosa cifras de facturación un chisco por riba dos 23 millóns de euros, con 154 traballadores empregados.