Vieiros

Un ano máis o Escenario Runas do Festival Ortigueira eríxese en plataforma dende a que impulsar aos novos creadores da Península. Xa está en marcha o concurso de maquetas do que sairán os grupos encargados de poñerlle música ás tardes do certame folc en 2006. A dirección artística do Festival procura novos talentos e tendencias en España e tamén en Portugal, un mercado tradicionalmente esquecido que se convirte agora nun dos obxectivos da organización.

Entre as novidades do Runas 2006, cómpre salientar o número de formacións noveis seleccionadas, que se ampliarán ata oito -dúas máis que en anos anteriores-. Todas elas recibirán un premio en metálico e unha axuda en concepto de desprazamento. Pero para chegar ata o Escenario Runas os grupos deberán ter superado dous procesos de selección. Unha escolla inicial, entre as maquetas enviadas, a cargo da organización do Festival Ortigueira. A segunda fase, que dará a relación definitiva de grupos, recaerá nun xurado conformado por críticos musicais dos principais medios de comunicación españois e lusos.

As bandas elixidas poránlle música ás tardes do Festival Ortigueira dende o Escenario Runas. Alí, e por segundo ano consecutivo, o público asistente poderá elixir ao seu favorito para depararlle un premio aínda maior: saltar ao Escenario Principal do Festival na súa edición de 2007.

As formacións que desexen participar na iniciativa deberán ter entre 3 e 10 compoñentes e non poderán contar con máis de dous discos no mercado. Se estas interesado/a, envíalle a túa maqueta en cedé -cun mínimo de catro temas sendo alomenos un deles de composición propia- antes do 10 de maio á organización do Festival.