Vieiros

A conselleira de Sanidade referiuse durante a súa intervención ao problema de "estaren esquecidas dalgún xeito todas as etapas e ciclos vitais da muller nos plans dos anteriores gobernos". Ao respecto laiouse de que moitas mulleres galegas teñan que marchar fóra de Galiza para abortar dentro dos supostos considerados legais e comentou que "non é de recibo que moitas mulleres deban ir deica Madrid para sometérense a outras intervencións que non son tecnoloxicamente complicadas".

Por outro lado, e ao respecto do nomeamento de Caramés para asumir agora a xerencia do CHUS, afirmou que a consellaría promoverá que este centro se convirta "nun hospital líder no sistema sanitario", do que destacou que sexa "o que máis proxectos de investigación ten de toda Galicia". Rubio animou especialmente a avanzar na investigación médica e anunciou o deseño dun plan de I+D+i "que coordine e fomente a investigación en toda a rede sanitaria". Sobre o asunto destacou a entrada en funcionamento en breve no CHUS dun "ciclotrón, único en toda Galicia, e que servirá para fabricar radio fármacos para todos os hospitais do noroeste español e especialmente para o da capital galega".