Vieiros

Serán entre 2007 e 2015 un total de 12.368 millóns de euros os que compromete fixar o Estado a través dos seus orzamentos xerais para a posta en marcha do bautizado Sistema Nacional de Dependencia. Cara á 2015, e en previsión da porcentaxe de poboación que daquela precisará destas axudas, o goberno español cavila que o sistema terá un custo de 9.500 millóns de euros, arredor do 1% do PIB. Dese total, os usuarios, e segundo a súa renda, soportarían o gasto de máis da metade, até 5.076 millóns, mentres que administración estatal e autonómica financiarían a partes iguais o resto de 4.424 millóns de euros.

Ao respecto pronunciouse este mércores o vicepresidente de Igualdade e Benestar, Anxo Quintana, quen gabou as oportunidades que abre este novo marco legal e subliñou que o avellentamento da poboación galega fai cada vez máis necesario incrementar a atención para as persoas maiores. Ao respecto, destacou as iniciativas promovidas polo executivo galego para a creación dunha rede pública de centros da terceira idade, que inclúa residencias e centros de día e recursos. Quintana asegurou que Galiza se beneficiará especialmente "deste novo escenario legal para a dependencia que por primeira vez proporciona un mecanismo de financiamento para que as políticas teñan eficacia e se vexan na práctica".