Vieiros

"Estes orzamentos serviron para ver como mudou o xeito de facer e de comportarse respecto ao anterior executivo", defendeu no pleno parlamentario o voceiro do grupo socialista. Destacou Ismael Rego que nesa liña "déuselle valor e dignifícase o papel da Cámara". Rego subliñou a aprobación dun abano de emendas presentadas polo PPdeG coma exemplo da "viraxe do novo goberno cara ao diálogo e o consenso". Gabando o que na súa opinión supón "unha nova orientación e un novo compromiso coa sociedade" e insistindo na vontade de "transparencia" do bipartito, o voceiro do PSdeG afirmou que se "produciu un claro xiro cara a normalización democrática" onde "ninguén debe sentirse excluído".

Desde o BNG, Carlos Aymerich lembrou que se aprobaron nesta negociación "máis emendas ca en 16 anos de goberno popular", e na mesma liña defendeu os orzamentos de 2006 coma "exemplo de diálogo". Ao tempo, o voceiro parlamentario do Bloque comentou que "desde o primeiro de xaneiro o valor do novo goberno vaise medir polo que faga e como o faga a partir de agora". Nese sentido dixo que "o que no pasado non se fixo non pode xustificar máis o que se faga no futuro". Aymerich afirmou que desta volta "non hai reparto de investimentos, senón distribución de recursos públicos" e gabou que o novo escenario "pon en valor ao Parlamento como institución". Moi especialmente, destacou os "cambios de forma e a transparencia que se traduce na desaparición da Lei de Acompañamento e a creación dun rexistro de subvencións".

O PP di que as súas emendas "corrixiron eivas"
"Permiten corrixir as eivas dunhas contas públicas defectuosas que, aínda así, frearán a creación de emprego e a converxencia con Europa", dixo o voceiro adxunto do PPdeG, Xosé Manuel Barreiro, a conta das emendas aos orzamentos aceptadas por PSdeG e BNG, "o cambio e transparencia tradúcense nun documento orzamentario cheo de eivas que tivo que corrixir o grupo popular", afirmou.

Segundo Barreiro "a ausencia de partidas destinadas a incentivar os investimentos da industria pesqueira de transformación ou a insuficiencia das achegas para a bolsa de vivenda en alugueiro son só dúas mostras da falta de rigor dos orzamentos de 2006". O PPdeG asefura que as contas do bipartito "priman o gasto corrente e unha crecente estrutura administrativa con dúas presidencias mentres que Galiza se aproxima a unha drástica redución dos fondos europeos". "Aumentan o gasto burocrático, o persoal de confianza e as partidas destinadas a enquisas e estudo", critican desde o PpdeG.

De xeito concreto, os populares referíronse tamén ao cambio dos 6 mil aos 12 mil euros no límite das das partidas económicas que se poden executar sen necesidade de fiscalización previa e a redución do prazo de tramitación de subvencións de 40 a 30 días coma "exemplo desa falta de rigor fiscalizador e de redución dos mecanismos de control".