Vieiros

Racións alimenticias preparadas para a súa distribución inmediata, botiquíns de primeiros auxilios, tendas de campaña, camións de auga potábel e outros vehículos para abastecementos, xeneradores eléctricos... Son algúns dos medios que de forma urxente precisan os equipos de emerxencia despregados nas zonas devastadas polo furacán e dos que o goberno estadounidense se ve incapaz de satisfacer a demanda.

Malia que o presidente Bush subliñara nun primeiro momento que os EEUU estaban en situación de resolver a catástrofe cos seus propios medios, o reiterado seguemento dos medios da situación, amosando as insuficiencias e o abandono no que sobreviven gran parte dos afectados levou finalmente á administración a realizar unha petición internacional de axuda a través da Axencia Federal de Control de Emerxencias.

A lentitude no despregue das medidas de urxencia fronte a un desastre anunciado, o coñecemento de que fondos destinados ao perfeccionamento dos diques de protección da cidade foron paralizados e posteriormente desviados á campaña militar, o despregue en Iraq de medios humanos e materiais que terían axudado á xestión desta crise, a lentitude de resposta e o caos provocado nas zonas afectadas... Todo un conxunto de circunstancias se acumulan contra a xestión da catástrofe da administración Bush, e ao contrario que na crise do 11S, desta volta semella que non haberá consenso político entre os dous grandes partidos para evitar as críticas ao labor presidencial.