Vieiros

"Pedirémoslle ao Comité Olímpico Internacional e ao movemento olímpico en xeneral que traballen xunto cos nosos membros en todo o mundo en solidariedade cos activistas dos dereitos humanos de China para presionar a prol de reformas concretas e positivas da situación dos dereitos humanos en China antes de agosto de 2008", afirmou recentemente Catherine Baber voceira e directora adxunta do Programa para Asia e Oceanía de Amnistía Internacional, "Lamentablemente e malia as promesas do COI, seguen cometéndose violacións graves aos dereitos dos cidadáns", advertiu. O colectivo lembra que a propia Carta Olímpica cita entre os seus principios fundamentais que "o Olimpismo proponse crear un estilo de vida baseado na alegría do esforzo, o valor do bo exemploe o respecto polos principios éticos fundamentais universais".

Amnistía prometeu vixiar estreitamente os progresos de China neste ámbito nos próximos tres anos, e dirixiulle unha vez máis ao goberno chinés as súas peticións prioritarias: derrogar a pena de morte ; reformar o sistema xudicial, permitirlle aos cidadáns gozar de total liberdade de expresión e asociación; sacar do cárcere a todos os presos de conciencia e persoas levadas a prisión por exercer o seu dereito á liberdade de expresión en internet e noutros medios; xustiza para as vítimas da represión de Tiananmen de 1989 e fin dos desaloxamentos forzados.