Vieiros

Durante unha rolda de prensa, Gerry Adams asegurou que o comunicado do IRA é "unha clara proba do compromiso dos republicanos para conseguir a paz". Durante o discurso tamén se solidarizou coa familia das vítimas do longo conflito e afirmou que a mellor homenaxe que se lles pode facer é lograr a paz.

Poucas horas despois de producirse o anuncio do IRA, Adams asegurou que "as loitas de liberación teñen varias fases e é tempo de situar a guerra no pasado". O líder do Sinn Féin rendeu homenaxe ao compromiso de todos os que tomaron a decisión de renunciar á loita armada e pediulles aos republicanos que puxeran "todas as súas enerxías na construción dunha nova Irlanda". O líder republicano subliñou que "por primeira vez" hai unha oportunidade para "lograr os nosos obxectivos por métodos pacíficos e democráticos". "É un desafío para todos", engadiu, e aventurou que "a historia non será amábel cos gobernos que non implementen os Acordos do Venres Santo".

Os primeiros ministros do Reino Unido e Eire acollen con satisfación o anuncio do IRA
Pola súa parte, o primeiro ministro británico, Anthony Blair, cualificou a decisión do IRA como "un paso de amplitude xamais vista", un día "en que a paz substitúe á guerra".

Tamén o primeiro ministro irlandés, Bertie Ahern, expresou a súa satisfación polo anuncio do IRA. "Doulle a benvida ao compromiso do IRA de acabar coa súa campaña armada, completar o proceso de decomiso e empregar exclusivamente métodos pacíficos", afirmou Ahern, subliñando qie "a fin do IRA como organización paramilitar é o resultado polo que os gobernos británico e irlandés estiveron traballando desde o cesamento das actividades militares en 1994". "Se as palabras do IRA son seguidas por accións verificadas, estamos diante dun acontecemento histórico", destacou o primeiro ministro e engadiu que "iste é un país fachendoso, seguro de si mesmo e moderno. Creo que podemos esperar un futuro de paz e prosperidade, baseado na confianza mutua e a reconciliación".