Vieiros

O vindeiro 23 de abril rematará o prazo establecido para a presentación de traballos aos Premios Curuxa. O Museo do Humor de Fene convoca un ano máis estes galardóns ao humor, que chegan xa á súa XVI edición. Na edición de 2004 optaron á distinción máis de 250 debuxos, procedentes de 38 países diferentes.

Segundo apuntan as bases do certame, que veñen de ser publicadas, establécese un único premio para o mellor debuxo presentado. Este consistirá nunha Curuxa do Humor, deseñada por Fco. Xosé Pérez Porto, e un premio en metálico de 1.502,5 euros. O Museo correrá ademais cos gastos de desprazamento e estadía de tres días para o gañador. A Curuxa Gráfica 2004 recaeu en por unanimidade en Cau Gómez, de Brasil.

O mesmo que en anos anteriores haberá unha distinción para un medio de comunicación, xornalista ou escritor especialmente vencellado ao humor. Esta Curuxa aos Medios, sen dotación económica, foi o pasado ano para a revista electrónica Tebeosfera e A Peneira, que edita quincenalmente o suplemento de humor O Farelo.

A Curuxa de Honra, sen dotación económica, premiará a traxectoria dunha persoa ou entidade caracterizada por desenvolver unha traxectoria vital en prol do humor. A Plataforma Nunca Máis recibiu o premio en 2004, por facer uso do humor en todas as súas actividades.

Xosé Ramón Gaioso, grazas á súa "aposta polo humor", obtivo na XV edición dos premios a Curuxa de Barro. Este galardón distingue a defensa de valores que o Museo do Humor quixera ver desterrados.

O fallo do xurado desta XVI edición darase a coñecer con antelación ás Xornadas do Humor, que terán lugar os días 11 e 12 de xuño de 2005.