Vieiros

As cifras son aínda moi confusas. As autoridades rusas falan de 1.200 secuestrados, dos que "máis de 150" puideron morrer. De momento, identificáronse xa 60 cadáveres, hai contabilizados uns 650 feridos, e todos os terroristas foron abatidos polo exército ruso, agás probablemente un, que aínda resista dentro da escola, quizais con algún refén.

As causas do asalto ao edificio son tamén confusas: as fontes oficiais sinalan que se produciu unha fuxida espontánea dunha trintena de reféns, e que o exército tentou cubrilos de forma que se iniciaron os combates e as mortes masivas. Outras fontes, en troques, falan dun asalto planificado, realizado no momento en que os secuestradores, logo dun pacto co exército, sacaban para fóra a ducia de cadáveres que se produciran durante a toma da escola.

Durante os combates producíronse polo menos tres explosións, ademais de tiroteos cruzados e indiscriminados. Tampouco está claro o número de asaltantes. As fontes oficiais falan dunha vintena, entre os cales habería polo menos dez de orixe árabe e un negro, e o resto caucásicos (chechéns, osetos, inguxetos...). Sen embargo, outras fontes sinalaron que poderían ser entre 35 e 40 persoas.