Vieiros

A Asociación Británica de Xordos recibiu con alegría a decisión, e anunciou que seguirá presionando para que a lexislación inglesa se vaia axustando ao que require a lingua de signos británica. O goberno de Blair estima que 70.000 xordos británicos empregan a lingua de signos, un código visual e xestual que ten un vocabulario, unha gramática e unha sintaxe de seu. Ademais, adquire un compromiso de protexer e promover esta lingua do mesmo xeito có resto de linguas minortitarias, e xa está establecendo unha serie de áreas funcionariais e servicios que deberían contar cun intérprete de lingua de signos.

No noso país, unha boa parte dos xordos empregan o dialecto galego da Lingua de Signos Española, que ofrece a penas algunhas peculiaridades propias sobre a base da lingua de signos común. Pero nin ese dialecto nin a lingua de signos española (que usan 200.000 xordos e xordas en todo o estado) gozan de ningún recoñecemento oficial. Nesta mesma lexislatura foron rexeitadas no Congreso dúas proposicións non de lei a prol do recoñecemento da lingua de signos e do dereito a unha educación bilingüe dos nenos e das nenas xordas. Tedes máis información na web da Federación de Asociacións de Xordos do País Galego.