Vieiros

Obrigar ao dobre casco neste tipo de buques e prohibir que operen baixo bandeira de conveniencia son dúas medidas fundamentais que segundo argumenta Greenpeace rematarían case por completo con catástrofes similares á do ‘Prestige’.

Lembran os ecoloxistas que moitos desastres anteriores: mar Exeo, Erika, Exonn Valdez, Urkiola,... reciben atención política no momento en que suceden pero co tempo, non se chega nunca a establecer as medidas preventivas que impedirían novas catástrofes similares.

Láiase Greenpeace que á compañía do ‘Prestige’ non se lle vaia esixir ningunha responsabilidade civil nin ambiental e que os custes de limpeza e recuperación caian se cubran con cartos públicos. Piden por iso, que se remate coas bandeiras de conveniencia, que lle permiten a petroleiros coma o ‘Prestige’ navegar sen cumprir ningún tipo de normativa nin control.

Segundo denuncian, a directiva para o control do transporte de sustancias perigosas prohíbe buques de máis de 15 anos e casco único, pero a demora na aplicación nos estados membros unha vez máis fai que non se chegue a tempo.

Por último, advirten do altísimo número de petroleiros que diaramente navegan preto das nosas costas e apuntan que non só é importante lembrarmos o risco medioambiental deste transporte, senón tamén o que significa: un modelo enerxético insostible e xerador de graves problemas, coma o cambio climático.