Vieiros

Un veciño de Mondariz cortaba recentemente oito carballos sen licencia. As autoridades, en cumplimento da lei, multábano con 214.000 pesetas. Máis recentemente, outro veciño cortaba ata 52 carballos. A Consellería de Medio Ambiente multábao con só 5.000 pesetas. Precisaremos que o segundo dos veciños era concelleiro do PP na vila pontevedresa, o que insinúa unha aplicación da lexislación ben pouco edificante por parte da consellería. O caso aconteceu na parroquia de Lougares, a pé do Pumariño, na cunca do Tea, parte da rede Natura 2000.

Segundo denuncia do BNG local, Emilio Barro, edil do PP, cortou 52 carballos. Incumpriu deste xeito a Lei de Montes, que prohibe a corta incontrolada de frondosas para evitar a reducción drástica do bosque autóctono.

A corta fíxose nunha propiedade súa a pé do regato Pumariño. Isto vai en contra da Lei de Pesca Fluvial. Nese documento, prohíbese a corta de árbores dentro da zona de policía,100 metros de todos os acuíferos, sen permiso das autoridades medioambientais.

Ademais, deixou esparexidas as ponlas dos carballos, incumprindo a Lei de Incendios forestais. Tal lei, prohibe aquelas accións que poidan favorecer a xeración ou propagación de incendios forestais. Foi, por certo, a única lei que se lle aplicou, e de aí a multa única de mil pesos, imposta dende a delegación provincial da Consellería de Medioambiente, por “deixar pólas de carballos esparexidas".

Ademais, non pagou a licencia que establece o Plan de Ordenación do Medio Rural de Mondariz, que obriga aos propietarios de masas forestais a solicitar licencia municipal e aboar unha taxa pola corta de madeira.

Por certo, que no lugar dos carballos prantou eucaliptos...

Preguntados por Vieiros, na Consellería de Medio Ambiente afirmaron descoñecer o caso. Na delegación de Pontevedra tampouco parecen lembralo, aínda que nos foi imposible falar directamente co delegado, José Luis Diez.

No próximo pleno da corporación, o BNG pedirá a Juan Reboreda, alcalde do PP, o cesamento do edil Emilio Barro.

A oposición de Mondariz lembra tamén que no ano 1999 o concelleiro do PP Ernesto Godoy trasladou, un autobús de 60 plazas a un monte comunal da parroquia mondarizana de Sabaxáns, onde quedou abandonado. A pesar das denuncias (BNG, SEPRONA da Garda Civil, Axentes Forestais...) a Consellería de Medioambiente nin multou a Ernesto Godoy nin fixo nada por ordear a retirada do autobús e o seu traslado a un depósito autorizado. Mesmo se levou unha queixa ao Valedor do Povo, quen instou ao Concello a ordear ao edil popular a inmediata retirada do ómnibus. A día de hoxe aínda non o fixo...