Do mesmo xeito que Nannerl outras mulleres tiveron que afrontar moitos obstáculos ao seu traballo como compositoras e as súas obras foron ignoradas. Malia todo, distintas investigacións están redescubrindo as súas composicións. Estes traballos mostran que as mulleres foron activas compositoras en todos os períodos da historia e en todos os estilos musicais. Xa dende a Idade Antiga se pode falar da existencia de mulleres compositoras. Na Idade Media os conventos son lugares nos que se desenvolve un importante labor musical tanto de interpretación como de composición. Pódese destacar o traballo de monxas como Hildegarda de Bingen, quen compuxo numerosas obras as cales sorprenden pola extensión das súas tesituras. Con todo, o traballo destas mulleres foi ignorado ata datas recentes, igual que as prácticas de composición de trobadoras e trobeiras da época. Durante este período da historia tamén as mulleres da realeza e da aristocracia se dedicaron á composición e moitas puideron publicar os seus traballos. Durante os séculos XVIII e XIX o número de compositoras semi-profesionais aumentou e as súas obras eran cada vez máis diversas. Algunhas das mais coñecidas son Fanny Hensel Mendelssohn ou Clara Wieck Schumann, que compuxeron obras instrumentais, corais e operísticas, aínda que o seu traballo musical foi coñecido mais polo seu labor como instrumentistas que polas súas composicións, as cales foron practicamente ignoradas durante anos. Aínda que a principios do século XX se produciu un declive no número de mulleres compositoras de música da tradición occidental, á vez o traballo de compositoras da época foi cada vez mais respectado e recoñecido. Como exemplo poderíase falar de Lili Boulanger, quen en 1913 gañou o importante premio Prix de Rome, recoñecéndose a gran complexidade das súas obras.