A presentación e mantemento do concurso correu ao cargo de Artur Trillo e Toño Casais, de "Talía Teatro", que escenificaron breves fragmentos da súa obra "Bicos con lingua", que se representará tamén na Facultade de Económicas o vindeiro día 16, como unha iniciativa conxunta das comisións de normalización lingüística de Económicas, Ciencias da Educación, Filoloxía e CC. da Información.

A profesora Xulia Guntín, como coordinadora da Comisión de Normalización de Económicas, foi a encargada de presentar a propia Comisión e o seu obxectivo: contribuír a estender o uso do galego no centro.

A seguir comezou a fase do concurso, no cal estaban inscritos 10 participantes, aínda que finalmente foron 8 os monologuistas presentados, entre os que figuraban estudantes, profesores e membros do PAS de toda a USC. A problemática das persoas xordomudas, a reinvindicación do castrapo, a atracción fatal por outro idioma, a historia da lingua vista a través da historia dunha familia, a reivindicación da "lingua proletaria do meu pobo", a diferencia entre a plenitude da lingua e falar coa boca chea, a política lingüística do Imperio Galego Galáctico ou a perda da lingua propia, foron os eixos dos monólogos presentados a concurso, que buscaba tanto ser unha actividade lúdica dentro da Facultade, como conseguir unha maior sensibilización cara á situación do galego. Con ese mesmo obxectivo presentaron os seus monólogos dous membros da CNL do centro, mais fóra de concurso.

O concurso estaba dotado con tres premios, consistentes nunha subscrición de balde a BIBLOS-Clube de Lectores por un ano, e en tres vales por unha contía de 500 € ao primeiro, 300 € ao segundo e 200 € ao terceiro, para a adquisición de libros a través deste mesmo Clube de Lectores. O xurado estaba constituído por Tucho Calvo, director literario do Clube de Lectores Biblos; Yolanda Castaño, poeta, escritora e directora do programa cultural de TVE en Galicia "Mercuria"; Ana Domínguez, membro da Comisión de Normalización Linguística da Facultade de CC. EE.; Isabel Vaquero, técnica do Servizo de Normalización Lingüística da USC; e Artur Trillo, actor e director teatral.

O primeiro premio outorgóuselle a Xosé Manuel Outeiriño, polo seu monólogo "A lingua e os borbóns de chocolate"; o segundo premio recaeu en Leonardo Fernández Campos, por "Castrapo pajuer"; Juan Vega González foi o merecedor do terceiro premio por "O cuchilo".



Ligazóns relacionadas:
Anteriores: A ver quen é máis rápido coa lingua, forasteiro

OUTRAS NOTICIAS
O Centro de Documentación Sociolingüística ofrece un kit de normalización
Propoñen que se introduza unha materia de lingua galega en Dereito
Núñez Feijoo pídelle ao executivo que aposte por unha educación trilingüe
A UE sinala que o pouco coñecemento de linguas estranxeiras é un lastre para as pemes
Os centros de estudos galegos de Escocia e Gales crean unha revista dixital sobre a lingua galega
A Mesa promove a actualización da Lei de uso do galego na Administración local
O precedente balear axudou a desbloquear o decreto do galego
O profesorado empregará a lingua materna para o ensino infantil
O novo decreto garante para o vindeiro curso o 50% das materias en galego
A Unesco lembra a necesidade de normalizar as linguas maternas