O Parque Natural das Fragas do Eume, a pesar da súa importancia ecolóxica, está sometido a unha serie de ameazas. Un exemplo disto é o proxecto de explotación de andalucita (mineral que se emprega para a fabricación de refractarios) no Monte Fontardión (As Pontes). Cun xacemento previsto de 30,1 hectáreas, das cais a metade pertencen ao Parque Natural, preténdense extraer 26 millóns de toneladas de material nos próximos 54 anos.

Os trámites do proxecto están bastante avanzados, no DOG do 4 de marzo someteuse a información pública o proxecto sectorial de aproveitamento de andalucita, o estudo de impacto ambiental, o plano de restauración e a declaración urxente de ocupación para a explotación na concesión promovida por Picobello Andalucita S.L.

Por outra banda, nas proximidades do lugar do Barqueiro (Cabanas), dentro do espazo natural protexido, está o parque de maquinaria dunha empresa de construción de estradas de dubidosa legalidade, onde se realizan operacións de mantemento (cambio de aceite, lavado…) sen ningún tipo de control, aparte de almacenar material de construción.

A debilidade da actual figura de protección agudízase no perímetro exterior do espazo protexido, permitíndose proxectos cun elevado custo ambiental.

Grandes superficies de bosque autóctono existentes no perímetro exterior do Parque Natural están expostas á degradación. Un exemplo diso é a concentración parcelaria da parroquia de Piñeiro (Xermade), coa apertura de pistas polos bosques da ribeira lucenses do Eume. Aínda non se produciron talas de importancia pero é previsible que se repita o acontecido nas parroquias pontesas de Bermui e de Ribadeume na década dos 80, cando a causa dunha concentración parcelaria desapareceu unha paisaxe tradicional galega composta por sebes centenarias e grandes superficies de fraga

Guerrilleiros das Fragas-FEG e a Federación Ecoloxista Galega están a favor do desenvolvemento das enerxías alternativas (solar, eólica, minihidráulica…) sempre que supoña unha redución real das enerxías contaminantes e non se dane espazos naturais protexidos. Por iso critican a existencia de dous proxectos de parques eólicos a menos de 100 m do límite do Parque Natural, o de Cisterna-Raño-Penafesa (Monfero) e o de Serra da Loba (Guitiriz). Ámbolos dous están paralizados temporalmente, o primeiro por danos no patrimonio cultural e o segundo por iniciar as obras sen ter superado tódolos trámites.

A escasa protección da zona perimetral das Fragas do Eume aféctalle especialmente a un núcleo reprodutor de lobo asentado na zona. A administración galega, en vez de favorecer a colonización do Parque Natural por esa especie, compensando os escasos danos producidos na cabana gandeira, permite o seu exterminio autorizando batidas en plena época de cría.

A xuízo dos ecoloxistas, o anteriormente exposto xustifica a necesidade de:

- Ampliar os límites do Parque Natural das Fragas do Eume.

- Dotalo dunha partida orzamentaria seria que permita a compensación xusta ós veciños afectados polas medidas conservacionistas .

- Un aumento dos servizos de vixilancia.

- A creación dun equipo de educación ambiental específico para os afectados polo espazo natural protexido.

OUTRAS NOTICIAS
As actividades realizaranse nos concello de Brión, Santiago de Compostela, Lugo, Rois ou Carballo
A actividade pretende reivindicar os valores do monte fronte ás chamas
O CES sinala dous impactos ambientais no río da chanca
A Asemblea do Suído (FEG) apoia a decisión da Xunta de Galiza de desestimar a construción de tres novos parques eólicos (PPEE) na Serra do Suído
SGHN oponse ao proecto da mina das Pontes
¿Quen defende o litoral en Cangas?
O Comité provincial de caza de Ourense solicitará ao Comité Galego, que non se cace raposo no mes de febreiro o ano que ven.
28 organizacións piden á Comisión Europea que non de súa aprobación ao Plan Nacional de Asignación 2008-2012
ADEGA rexeita a declaración de supramunicipalidade das piscifactorías de Quilmas e Baroña á marxe do novo Plano Sectorial
A Consellería precisou en contestación por escrito diante do COGAMA que o proxecto do lago da mina das Pontes conta xa coa respectiva Declaración de Impacto Ambiental e autorización de vertido e captación sobre o Eume