Letras 97

Vieiros, a comunidade galega, aquelas e aqueles que día a día construímos o ciberespacio, a ciberseara galaica, queremos demostrar que os nosos clásicos non só van seguir vivos na sociedade do futuro, senón que os novos medios axudarán á súa difusión e a descubrir outras formas de lectura e creación máis ricas, máis plenas, máis libres.

Fole representa a Galicia máis tradicional. A Lus do Candil, a súa obra primeira publicada, é unha ollada ó máis profundo da sociedade galega. Un mundo que viu a súa propia transformación, nalgúns casos necesaria -como en todo proceso evolutivo- noutros debida a imposicións que é preciso corrixir.

Non é obxectivo noso idealizar un mundo, nin identificar un tempo e un espacio determinados coa única e máis pura das formas galegas. Galicia é moito máis: desde o bruar dun trailer nunha autoestrada ata o barullo calado da auga nunha braña.

Mais é obriga aprender do que mellor mantivo e nos soubo transmitir o alento do noso ser. E sermos conscientes de que, na nova sociedade que ha vir, moitas das claves, das solucións, moito do que somos, do que ha facer de nós un pobo firme no mundo, déunolo esa paisaxe, esa loita, ese traballo, ese universo que agora nos toca divulgar, ampliar e mellorar...

Entrar á versión ciberespacial e hipertextual.

Agradecementos
A elaboración da idea deste 17 de maio débese en boa medida ás propostas de Luis Misa e Manuel Forcadela. O coidado lingüístico do texto de Fole é obra de Armando Requeixo. Os dereitos de autor son propiedade da Editorial Galaxia e Concepción Fole Otero que desinteresadamente permitiron que esta experiencia sexa posible.