O desastre das Pías
Xaneiro de 1998. A plataforma Discover Enterprise destrozaba a ponte das Pías. Velaquí unha reportaxe gráfica de Kiko Delgado. Para cubrir o tema e informar puntualmente xurde Vieiros Ferrol.

Día da Patria
Suplemento conmemorativo do 25 de xullo. Editado en 1996, con referencias ao contido histórico da celebración, incluindo varias proclamas e discursos entre os anos 1920 e 1948.

A Leiteira
Vieiros lanzaba en maio de 1998 unha web dedicada integramente a defender e dar a coñecer o castigado sector leiteiro galego.

Hai que cambiar o mundo
Reivindicando a paz, pero non só. Tamén unha estratexia distinta, un cambio nas relacións económicas e políticas entre o Norte e o Sur, unha política internacional distinta, liderada pola ONU -ou non: hai que cambiar o mundo. Especial creado logo do 11-S.

Hai que cambiar o mundo 2.0
Un especial informativo sobre dous foros mundiais opostos: o Foro Económico Mundial en Nova York e o Social Mundial en Porto Alegre. Capitalistas contra antiglobalizadores. Son as dúas caras da mesma moeda, do mesmo sistema económico e social. Do 31 de xaneiro ao 4 de febreiro de 2002.

Hai que cambiar o mundo 3.0
A ameaza dunha nova guerra contra Iraq centrou este especial adicado a George Bush e as súas ansias de venganza (e de petróleo) contra Saddam Hussein.

A negra sombra do Prestige
Unha nova catástrofe ecolóxica que asola Galicia dez anos despois do Mar Exeo. A marea negra máis grande da historia e as súas consecuencias. Foi en novembro de 2002...

Hai que cambiar o mundo 4.0
Máis de cen mil persoas de 126 países debaten entre o 23 e o 28 de xaneiro do 2003 un espacio de debate e propostas de transformación. O lema do Fórum Social Mundial segue vixente desde a primeira edición: "outro mundo é posible", desta volta co reforzo do novo ‘goberno Lula’ no país anfitrión.

Madrid, 23F
Convocada pola Plataforma Nunca Máis o 23 de febreiro do 2003, esta manifestación quedará para a historia como a maior reivindicación por Galicia nas rúas da capital. En Vieiros contámoslles como ir, o percorrido da marcha, que facer en Madrid e ofrecémoslles os manifestos lidos como peche dos actos.

A conquista de Iraq
Unha pregunta por cada morto, pola memoria deturpada, pola razón eivada. Seguemento completo do conflicto: a operación militar, o enfrontamento político, a crise humanitaria, as mobilizacións contra a guerra, repercusións económicas, información e contrainformación. Tamén un completo guieiro sobre o escenario, abano de ligazóns e chat-entrevista con, entre outros, Ramón Chao e Armand Mattélart. Ademais, lanzamos poemas na rede para calar o estourido das bombas.

A Europa que queremos
"Falta información e sobra propaganda". O descoñecemento sobre as claves do debate arredor do futuro da Unión Europea eran evidentes fronte á convocatoria do referendo sobre a Constitución Europea. Vieiros abriu un espazo que abrangue unha cronoloxía coas datas clave no proceso recente de construcción europea, as razóns básicas coas que argumentan os defensores do "si" e os do "non", os principais condicionantes en cada un dos estados membros, a opinión dos internautas e a de persoeiros varios da sociedade galega e un guieiro de ligazóns onde ampliar.